殊途，同歸
噚晚終於睇晒《三命》。睇咗銀河咁多套講命運嘅電影，今次好似係第一次睇電視劇，好特別嘅體驗。
當初某個時刻嘅三種決定，演變出三條唔同嘅人生路。漫畫係阿信嘅一生摯愛，無論當初有冇堅持畫落去，佢最終都係喺漫畫都陪伴下結束一生。最愛嘅嘢，原來就算逼於無奈放低好耐，當有機會再次回望，始終可以畀人最大嘅快樂。縱使三個平行宇宙終究同歸，但當初殊途嘅選擇係咪就此變得無意義呢？唔同選擇帶嚟各自嘅得失，呢啲體驗係咪值得？
結局嘅最後亦都好耐人尋味，如果係第四種命運，阿信一出世就夭折，噉就根本冇之後嘅人生可言。如果曾經嘅考驗冇得出最壞嘅結果，無論系命運嘅眷顧定犧牲嘅偉大，可能我哋依家每一下心跳，每一口呼吸，已經系賺咗。再次面對得失時，係咪可以睇開啲？
呢套劇有種盡地一鋪嘅感覺，值得一再回味，睇完感悟好多，但亦都有更多疑問。銀河再講命運會係點，着實期待。
命，究竟係整定，一或係自己揀？The answer is blowing in the wind.
